احيانا ممكن تكون رايح اوضتك تجيب حاجة معينة .. بعد ما تدخل تنسي تماما انت كنت جاي ليه .. اكيد كلنا اتعرضنا للموقف ده كتير في حياتنا اليومية .. تنسي .. تحاول تفتكر .. تفرك راسك وتعصر مخك لكن مفيش فايدة .. فجأة .. ترجع لنفس المكان اللي كنت فيه .. تقعد علي نفس الكرسي .. اخيرا تفتكر انت كنت عايز تعمل ايه .. طبعا مش دايما ده بيحصل .. لكنه بيحصل كتير والحالة دي بيسموها " التذكر المرتبط بالحالة " .. بمعني انك ممكن تفتكر الحاجة اللي انت ناسيها لو رجعت لنفس الحالة اللي كنت عليها ..
لنفس السبب ده لجأت سيدة في الثلاثين من عمرها لطلب العلاج لشعورها بالفزع أثناء ممارسة العلاقة الجنسية مع زوجها لأن ذراعها " انثني " تحتها وتألمت .. ده أدي أثار عندها ذكريات حادث اغتصاب كانت معتقده انها نسيته وكان المغتصب وقتها ثبت ذراعها تحتها بنفس الشكل .. وده اللى ممكن يحصل بالنسبة للناجيات فى وقت الحمل والولادة والرضاعة . ممكن يجيلها نوبات ذعر لأنها شاعرة انها خارج السيطرة .. شاعرة ان كل ما بطنها بتكبر فكل العالم هيعرف انها مارست الجنس. كل ما بطنها بتكبر بتشعر ان ده كمان نوع من التحرش وبيرجعها لنفس الأحاسيس اللى شعرت بيها وقت التحرش.